‏1 ذڭْ ؤُسڭّْوَاسْ وِيسّْ ثْڒَاثَا ن هُوشِيعَا، مِّيسْ ن إِلَا، أَجدْجِيذْ ن إِسْرَائِيل، إِمْسَارْ بلِّي حِيزْقِييَا إِذْوڒْ ذ أَجدْجِيذْ. نتَّا ثُوغَا ذ مِّيسْ ن أَحَازْ، أَجدْجِيذْ ن يَاهُوذَا. ^▪   ‏2 نتَّا ثُوغَا غَارسْ خمْسَا ؤُ-عِيشْرِينْ ن إِسڭّْوُوسَا ؤُمِي إِذْوڒْ ذ أَجدْجِيذْ. نتَّا إِحْكمْ ثسْعَا ؤُ-عِيشْرِينْ ن إِسڭّْوُوسَا ذِي ؤُرْشَالِيمْ. يمَّاسْ قَّارنْ أَسْ أَبِي، يدْجِيسْ ن زَاكَارِييَّا. ‏3 نتَّا إِڭَّا مِينْ إِدْجَانْ نِيشَانْ ذِي ثِيطَّاوِينْ ن سِيذِي، نِيشَانْ أَمْ مَامّشْ ث إِڭَّا بَابَاسْ ذَاوُوذْ. ‏4 نتَّا إِكّسْ ڒڭْعُوذِي، يَارْژَا إِمَايْضُوثنْ إِقدّْسنْ، إِهْذمْ ثَاربِّيثْ ن شْوَارْثِي ؤُشَا إِڒْبزْ أَفِيغَارْ ن نّْحَاسْ إِ ثُوغَا إِڭَّا مُوسَا مِينْزِي أَيْثْ ن إِسْرَائِيل ثُوغَا إِ ذ أَسْ د-يِيوْينْ ثِيوْهِيبِينْ ن ڒبْخُورْ غَارسْ أَڒْ ؤُسَّانْ نِّي. نتَّا إِڒَاغَا أَسْ نَاحُوشْثَانْ. ^▪   ‏5 نتَّا إِتّْشڒْ خْ سِيذِي، أَربِّي ن إِسْرَائِيل. جَارْ مَارَّا إِجدْجِيذنْ ن يَاهُوذَا إِنِّي د-يُوسِينْ أَوَارْنِي أَسْ نِيغْ دَّارنْ قْبڒْ نّسْ، وَارْ ثُوغِي إِدْجِي ؤُڒَا ذ إِجّْ أَمْ نتَّا. ‏6 نتَّا ثُوغَا إِضْفَارْ أَبْرِيذْ ن سِيذِي، وَارْ خَاسْ إِحيّذْ شَا زِي ضفَّارْ نّسْ. نتَّا ثُوغَا إِحطَّا ڒُومُورَاثْ نّسْ نِّي ثُوغَا يُومُورْ سِيذِي إِ مُوسَا. ‏7 سِيذِي ثُوغَا أَكِيذسْ. مَانِي مَا ثُوغَا إِتّْرَاحْ، ثُوغَا إِفْڒحْ. نتَّا إِغوّغْ خْ ؤُجدْجِيذْ ن أَشُّورْ ؤُ وَارْ خَاسْ إِسخَّارْ عَاذْ. ‏8 نتَّا إِغْڒبْ خْ إِفِيلِيسْطِينِييّنْ غَارسْ أَڒْ غَازَّا أَكْ-ذ جّْوَايهْ نّسْ، زِي لْپُورْجْ ن إِعسَّاسنْ غَارسْ أَڒْ ثَانْذِينْثْ إِفَارْينْ س إِغبْرَاونْ. ^▪  

‏9 ذڭْ ؤُسڭّْوَاسْ وِيسّْ أَربْعَا ن ؤُجدْجِيذْ حِيزْقِييَا، ذ أَسڭّْوَاسْ وِيسّْ سبْعَا ن هُوشِيعَا، مِّيسْ ن إِلَا، أَجدْجِيذْ ن إِسْرَائِيل، إِمْسَارْ بلِّي شَالْمَانَاسَّارْ، أَجدْجِيذْ ن أَشُّورْ، إِڭعّذْ ضِيدّْ إِ سَامَارْيَا ؤُشَا إِطّفْ إِ-ت. ^▪  

‏10 نِيثْنِي طّْفنْ ت أَوَارْنِي إِ ثْڒَاثَا ن إِسڭّْوُوسَا. ذڭْ ؤُسڭّْوَاسْ وِيسّْ ستَّا ن حِيزْقِييَا، أَقَا-ث ذ أَسڭّْوَاسْ وِيسّْ ثسْعَا ن حُوشِيعَا، أَجدْجِيذْ ن إِسْرَائِيل، طّْفنْ نِيثْنِي سَامَارْيَا. ^▪  

‏11 أَجدْجِيذْ ن أَشُّورْ إِنْذهْ أَيْثْ ن إِسْرَائِيل ذِي لْمنْفَا غَارْ أَشُّورْ ؤُشَا يِيوْيِي ثنْ غَارْ حَالَاحْ، غَارْ خَاپُورْ، زَّاثْ ن يغْزَارْ ن جُوزَانْ ذ ثْندَّامْ ن إِمَاذَاينْ،

‏12 مَاغَارْ نِيثْنِي ثُوغَا وَارْ سْڒِينْ غَارْ مِينْ ذ أَسنْ إِنَّا سِيذِي، أَربِّي نْسنْ، ؤُشَا أَرْژِينْ ڒْعَاهْذْ نّسْ. مَارَّا مِينْ يُومُورْ مُوسَا، أَمْسخَّارْ ن سِيذِي، وَارْ ذ أَسْ سْڒِينْ ؤُ وَارْ ث ڭِّينْ. ^▫  

‏13 ذڭْ ؤُسڭّْوَاسْ وِيسّْ أَرْبعْطَاشْ ن ؤُجدْجِيذْ حِيزْقِييَا إِفّغْ سَانْحَارِيبْ، أَجدْجِيذْ ن أَسُّورْ، غَارْ مَارَّا ثِيندَّامْ إِفَارْينْ س إِغبْرَاونْ ن يَاهُوذَا ؤُشَا إِحوّسْ إِ-ثنْثْ. ^▪  

‏14 حِيزْقِييَا، أَجدْجِيذْ ن يَاهُوذَا، إِسّكّْ إِرقَّاسنْ غَارْ ؤُجدْجِيذْ ن أَشُّورْ، غَارْ لَاخِيشْ، إِنَّا: ”نشّْ خْضِيغْ! بعّذْ خَافِي! مَارَّا مِينْ خَافِي غَا ثڭّذْ، أَذْ ث خدْجْصغْ.“ خنِّي إِڭَّا ؤُجدْجِيذْ ن أَشُّورْ إِشْثْ ن لْجِيزْيَا خْ حِيزْقِييَا، أَجدْجِيذْ ن يَاهُوذَا: ثڒْثْ مْيَا ن ثَالِينْثَاثْ ن نُّوقَارْثْ ذ ثْڒَاثِينْ ن ثَالِينْثَاثْ ن وُورغْ.

‏15 حِيزْقِييَا إِوْشَا مَارَّا نُّوقَارْثْ نِّي إِتّْوَافنْ ذِي ثَادَّارْثْ ن سِيذِي ؤُ ذڭْ إِخَّامنْ ن ثْخُوبَايْ ن ثَادَّارْثْ ن ؤُجدْجِيذْ.

‏16 ذِي ڒْوقْثْ نِّي إِقسّْ حِيزْقِييَا، أَجدْجِيذْ ن يَاهُوذَا، مَارَّا وُورغْ ن ثوُّورَا ن زَّاوشْثْ ثَامقّْرَانْثْ ن سِيذِي ؤُ ن ڒضْرُوفْ غَارْ ؤُغزْذِيسْ ن ثوَّارْثْ إِنِّي ثُوغَا إِغدْجفْ حِيزْقِييَا، أَجدْجِيذْ ن يَاهُوذَا، س وُورغْ ؤُشَا إِوْشَا إِ-ث إِ ؤُجدْجِيذْ ن أَشُّورْ.

‏17 خنِّي إِسّكّْ أَجدْجِيذْ ن أَشُّورْ لْجِينِيرَالْ أَكْ-ذ ؤُزدْجِيفْ ن إِمْسخَّارنْ إِشنْعنْ ذ ؤُكُومَانْذَارْ ن ڒْعسْكَارْ أَكْ-ذ إِجّْ ن ڒْعسْكَارْ ذ أَمقّْرَانْ أَطَّاسْ زِي لَاخِيشْ غَارْ ؤُجدْجِيذْ حِيزْقِييَا ذِي ؤُرْشَالِيمْ. نِيثْنِي ڭعّْذنْ، إِوْضنْ غَارْ ؤُرْشَالِيمْ. ؤُشَا أَوَارْنِي ڒَامِي ڭعّْذنْ ؤُشَا إِوْضنْ نِيثْنِي، بدّنْ غَارْ ثْسدْجْيَا ن ؤُيڒْمَانْ ن سنّجْ، ونِّي إِدْجَانْ غَارْ وبْرِيذْ يُوعْڒَانْ غَارْ وحْوِيشْ ن ؤُصبَّانْ.

‏18 نِيثْنِي ڒَاغَانْ حِيمَا أَذْ د-يَاسْ ؤُجدْجِيذْ. خنِّي ؤُيُورنْ غَارْسنْ أَلْيَاقِيمْ، مِّيسْ ن حِيلْقِييَا، ونِّي ذ ڒمْقدّمْ ن ثْزذِّيغْثْ ن ؤُجدْجِيذْ، أَكْ-ذ ؤُمَارِيرْ شِيبْنَا ذ يُووَاخْ، مِّيسْ ن أَسَافْ، أَمَارِيرْ ن ؤُمزْرُويْ.

‏19 أَكُومَانْذَارْ ن ڒْعسْكَارْ إِنَّا أَسنْ: ”إِنِيمْ إِ حِيزْقِييَا: ’أَمُّو إِ إِقَّارْ ؤُجدْجِيذْ أَمقّْرَانْ، أَجدْجِيذْ ن أَشُّورْ: مَانْ أَثشْڒِي أَيَا إِ خْ ثتّشْڒذْ؟ ‏20 أَقَا-ث ذ ڒْهَارْذْ ن إِينْشِيشنْ وَاهَا، ؤُمِي ثنِّيذْ: أَقَا غَارْنغْ ثِيمژْرَا ذ جّهْذْ إِ ؤُمنْغِي! مَانْ ونْ إِ خْ ثتّشْڒذْ، أَقَا شكْ ثْغوّْغذْ خَافِي؟ ‏21 خْزَارْ، ڒخُّو ثتّشْڒذْ خْ مِيصْرَا، خْ ؤُغَانِيمْ نِّي إِنّْضفْسنْ ونِّي، ؤُمِي حذْ خَاسْ إِ غَا إِعمّذْ، إِتّجِّي ذڭْ ؤُفُوسْ نّسْ ؤُشَا إِسّْنُوقّبْ إِ-ث. أَمُّو إِ يدْجْ فِيرْعُونْ، أَجدْجِيذْ ن مِيصْرَا، إِ مَارَّا إِنِّي خَاسْ إِتّشْڒنْ. ^▪   ‏22 مَاڒَا كنِّيوْ أَذْ ذ أَيِي ثِينِيمْ: نشِّينْ نتّْشڒْ خْ سِيذِي، أَربِّي نّغْ، خنِّي نشّْ أَذْ إِنِيغْ، مَا نتَّا وَارْ إِدْجِي ذ ونِّي إِ زِي إِحيّذْ حِيزْقِييَا ڒڭْعُوذِي ذ إِعَالْطَارنْ ؤُ خنِّي إِنَّا إِ يَاهُوذَا ذ ؤُرْشَالِيمْ: أَذْ ثَاضَارمْ زَّاثْ إِ ؤُعَالْطَارْ-أَ ذِي ؤُرْشَالِيمْ! ؟ ‏23 خنِّي ڒخُّو، أڭّْ مَاشَا أَكْ-ذ سِيذِي إِنُو، أَجدْجِيذْ ن أَشُّورْ، إِجّْ ن ؤُمْحَارّمْ. نشّْ أَذْ أَشْ وْشغْ أَڒْفَاينْ ن إِيْسَانْ مَاڒَا شكْ زڭْ ؤُغزْذِيسْ نّكْ أَذْ أَسنْ د-ثَاوْيذْ إِمْنَاينْ. ‏24 مَامّشْ ثخْسذْ أَذْ ثنّْقڒْبذْ خْ وُوذمْ ن لْوَالِي، ونِّي قَاعْ ذ أَمژْيَانْ ن إِمْسخَّارنْ ن سِيذِي إِنُو، ؤُشَا أَذْ ثتّشْڒذْ خْ مِيصْرَا ذِي سِّيبّثْ ن إِكَارُّوثنْ ذ إِمْنَاينْ؟ ‏25 عَاوذْ، مَاغَارْ مَا نشّْ ڭعّْذغْ-د ضِيدّْ ن ومْشَانْ-أَ حِيمَا أَذْ ث أَردّْدْجغْ بْڒَا سِيذِي؟ سِيذِي إِنِي أَيِي: ڭَاعّذْ ضِيدّْ إِ ثمُّورْثْ-أَ، أَردّدْجْ إِ-ت.‘ “

‏26 ؤُشَا نَّانْ أَلْيَاقِيمْ، مِّيسْ ن حِيلْقِييَا ذ شِيبْنَا ذ يُووَاخْ إِ ؤُكُومَانْذَارْ ن ڒْعسْكَارْ: ”سِيوڒْ عَافكْ س إِڒسْ ن ثْرَامِيثْ أَكْ-ذ إِمْسخَّارنْ نّكْ، مِينْزِي نفْهمْ أَسْ مْلِيحْ. وَارْ كِيذْنغْ سِّيوِيڒْ س ثْيَاهُوذشْثْ ذڭْ إِمزُّوغنْ ن ڒْڭنْسْ إِ إِدْجَانْ خْ ڒْحِيضْ.“ ‏27 مَاشَا أَكُومَانْذَارْ ن ڒْعسْكَارْ إِنَّا أَسنْ: ”مَا إِسّكّْ أَيِي-د سِيذِي إِنُو غَارْ سِيذِي نّكْ ؤُ غَاركْ وَاهَا حِيمَا أَذْ سِّيوْڒغْ أَوَاڒنْ-أَ، وَارْ إِدْجِي إِ يرْيَازنْ نِّي إِقِّيمنْ خْ ڒْحِيضْ، مَاحنْذْ أَذْ إِنِيغْ أَقَا أَثنْ جْمِيعْ أَكِيذْومْ أَذْ شّنْ أَسُوفّغْ نْسنْ ؤُ أَذْ سْونْ إِبشِّيشنْ نْسنْ؟“ ‏28 خنِّي إِكَّارْ ؤُكُومَانْذَارْ، إِڒَاغَا س جّْهذْ س ثْيَاهُوذشْثْ ؤُشَا إِسِّيوڒْ، إِنَّا: ”سْڒمْ إِ وَاوَاڒْ ن ؤُجدْجِيذْ أَمقّْرَانْ، أَجدْجِيذْ ن أَشُّورْ! ‏29 أَمُّو إِ إِقَّارْ ؤُجدْجِيذْ: ’حْضَامْ وَارْ كنِّيوْ إِتّْغشِّي حِيزْقِييَا مِينْزِي نتَّا وَارْ إِزمَّارْ أَذْ كنِّيوْ إِفكّْ زڭْ ؤُفُوسْ نّسْ. ‏30 وَارْ تّجِّيمْ حِيزْقِييَا أَذْ كنِّيوْ يَارّْ أَذْ ثتّشْڒمْ خْ سِيذِي، أَذْ ثِينِيمْ: سِيذِي أَذْ أَنغْ إِسّنْجمْ نِيشَانْ ؤُ ثَانْذِينْثْ-أَ وَارْ ثتّْموْشِي شَا ذڭْ إِفَاسّنْ ن ؤُجدْجِيذْ ن أَشُّورْ.‘ ‏31 وَارْ ثسْڒِيمْ شَا غَارْ حِيزْقِييَا، مَاغَارْ أَمُّو إِ إِقَّارْ ؤُجدْجِيذْ ن أَشُّورْ: ’ڭّمْ أَيِي أَرَّايْ ؤُشَا فّْغمْ-د زِي ثنْذِينْثْ غَارِي، خنِّي إِزمَّارْ كُوڒْ إِجّنْ زَّايْومْ أَذْ إِشّْ زِي ثْزَايَارْثْ نّسْ ؤُ زڭْ وَارْثُو ن ثَازَارْثْ نّسْ ؤُ أَذْ إِسُو أَمَانْ زڭْ وَانُو نّسْ، ‏32 غَارسْ أَڒْ ذ غَا د-أَسغْ ؤُ أَذْ كنِّيوْ أَوْيغْ غَارْ إِشْثْ ن ثمُّورْثْ أَمشْنَاوْ ثَامُّورْثْ نْومْ: غَارْ إِشْثْ ن ثمُّورْثْ ثشُّورْ س إِمنْذِي ذ بِينُو ن جْذِيذْ، غَارْ إِشْثْ ن ثمُّورْثْ ثشُّورْ س وغْرُومْ ذ إِمَارْجَاعنْ ن ؤُضِيڒْ، إِشْثْ ن ثمُّورْثْ ن زِّيثُونْ ذ زّشْثْ ذ ثَامّنْثْ. أَمُّو إِ غَا ثقِّيممْ ثدَّارمْ، وَارْ ثْمتِّيمْ شَا. وَارْ تّسْڒِيمْ غَارْ حِيزْقِييَا، مَاغَارْ نتَّا إِتّْغَارَّا كنِّيوْ خْمِي إِقَّارْ: سِيذِي أَذْ أَنغْ إِسّنْجمْ! ‏33 مَا زمَّارنْ خنِّي إِربِّيثنْ ن ڒڭْنُوسْ، كُوڒْ إِجّْ زَّايْسنْ، أَذْ فكّنْ ثَامُّورْثْ نْسنْ زڭْ ؤُفُوسْ ن ؤُجدْجِيذْ ن أَشُّورْ؟ ‏34 مَانِي دْجَانْ إِربِّيثنْ ن حَامَاثْ ذ أَرْفَاذْ؟ مَانِي دْجَانْ إِربِّيثنْ ن سَافَارْوَايِيمْ ذ هَانِيعْ ذ عِيوَا؟ مَا سّْنجْمنْ نِيثْنِي سَامَارْيَا زڭْ ؤُفُوسْ إِنُو؟ ‏35 مَانْ ونْ زِي مَارَّا إِربِّيثنْ ن ثمُّورَا نّغْنِي إِ إِسّْنجْمنْ ثَامُّورْثْ نّسْ زڭْ ؤُفُوسْ إِنُو أَڒَامِي إِ غَا إِسّنْجمْ سِيذِي ؤُرْشَالِيمْ زڭْ ؤُفُوسْ إِنُو؟‘ “

‏36 ڒْڭنْسْ مَاشَا إِسّغْذْ، وَارْ خَاسْ د-يَارِّي س ؤُڒَا ذ إِجّْ ن وَاوَاڒْ، مَاغَارْ ڒُومُورْ ن ؤُجدْجِيذْ إِنَّا: ”كنِّيوْ وَارْ خَاسْ د-ثَارِّيمْ شَا!“ ‏37 خنِّي يُوسَا-د أَلْيَاقِيمْ، مِّيسْ ن حِيلْقِييَا، ڒمْقدّمْ ن ثْزذِّيغْثْ ن ؤُجدْجِيذْ، أَكْ-ذ شِيبْنَا أَمَارِيرْ، ذ يُووَاخْ، مِّيسْ ن أَسَافْ، أَمَارِيرْ ن ؤُمزْرُويْ س وَارُّوضْ إِشَارّْڭنْ غَارْ حِيزْقِييَا. نِيثْنِي حَاجَانْ أَسْ مَارَّا أَوَاڒنْ ن ؤُكُومَانْذَارْ ن ڒْعسْكَارْ.