‏1 ثُوغَا ذِينْ إِجّْ ن ورْيَازْ إِ وَارْ إِسكّْوِينْ. ثُوغَا قَّارنْ أَسْ شَابَاعْ، مِّيسْ ن بِيكْرِي، إِجّْ ن ؤُبِينْيَامِينِي. نتَّا إِصُوضْ ذڭْ ؤُيِيشّْ ن إِشَارِّي، إِنَّا: ”نشِّينْ وَارْ غَارْنغْ ثَاسْغَارْثْ ذِي ذَاوُوذْ ؤُ نشِّينْ وَارْ غَارْنغْ ڒْوَارْثْ أَكْ-ذ مِّيسْ ن يَاسَّا. أجّْ كُوڒْ أَرْيَازْ أَذْ يُويُورْ غَارْ إِقِيضَانْ نّسْ، أَ إِسْرَائِيل!“ ‏2 ؤُشَا كُوڒْ أَرْيَازْ إِفّغْ زِي ضفَّارْ ن ذَاوُوذْ، إِرُوحْ أَوَارْنِي إِ شَابَاعْ، مِّيسْ ن بِيكْرِي. مَاشَا إِرْيَازنْ ن يَاهُوذَا قِّيمنْ ڒسْقنْ أَكْ-ذ ؤُجدْجِيذْ نْسنْ، زِي لْ'ؤُرْذُونْ غَارسْ أَڒْ ؤُرْشَالِيمْ.

‏3 ؤُمِي يُوذفْ ذَاوُوذْ غَارْ ثَادَّارْثْ نّسْ ذِي ؤُرْشَالِيمْ، إِكْسِي ؤُجدْجِيذْ عشْرَا ن ثمْغَارِينْ، ثِييَّا نّسْ ثِينِّي ثُوغَا إِجَّا أَوَارْنِي أَسْ حِيمَا أَذْ حْضَانْثْ ثَادَّارْثْ. نتَّا إِڭَّا إِ-ثنْثْ ذڭْ إِشْثْ ن ثَادَّارْثْ ثتّْوَاحْضَا ؤُ نتَّا إِتّْهِيلَّا ذَايْسنْثْ، مَاشَا وَارْ غَارْسنْثْ يُوذِيفْ. نِيثنْثِي قِّيمنْثْ بلّْعنْثْ أَڒْ أَسّْ ن ڒْموْثْ نْسنْثْ، أَمْ ثِيجَّاڒْ أَڒْ أَنڭَّارْ ن ثُوذَارْثْ نْسنْثْ.

‏4 إِنَّا ؤُجدْجِيذْ عَاوذْ إِ عَامَاسَا: ”ڒَاغَا-د خْ يرْيَازنْ ن يَاهُوذَا أَذْ مُوننْ غَارِي ذِي ثْڒَاثَا ن وُوسَّانْ ؤُشَا خنِّي بدّْ شكْ ذَا!“ ‏5 عَامَاسَا إِفّغْ حِيمَا أَذْ إِڒَاغَا-د خْ يَاهُوذَا أَذْ سّْمُوننْ، مَاشَا نتَّا إِعطّڒْ خْ ڒْوقْثْ إِ ثُوغَا أَكِيذسْ إِڭَّا ؤُجدْجِيذْ. ‏6 خنِّي إِنَّا ذَاوُوذْ إِ أَبِيشَايْ: ”ڒخُّو أَذْ أَنغْ إِڭّْ شَابَاعْ، مِّيسْ ن بِيكْرِي، ثُوعفّْنَا مَاهُو خْ أَبْشَالُومْ. كْسِي أَكِيذكْ إِمْسخَّارنْ ن سِيذِي ؤُ ضْفَارْ إِ-ث، حِيمَا نتَّا وَارْ إِزمَّارْ أَذْ يَافْ إِ يِيخفْ نّسْ ثِيندَّامْ إِفَارْينْ ؤُشَا أَذْ إِودَّارْ زِي ثِيطَّاوِينْ نّغْ.“ ‏7 فّْغنْ يرْيَازنْ ن يُووَابْ، ؤُيُورنْ أَوَارْنِي أَسْ، أَكْ-ذ إِعسَّاسنْ ن أَرِّيمثْ ذ إِرقَّاسنْ ن ثَازْڒَا ذ مَارَّا أَيْثْ ن بُو-ثغْرُوضْثْ. نِيثْنِي فّْغنْ-د زِي ؤُرْشَالِيمْ حِيمَا أَذْ ضْفَارنْ شَابَاعْ، مِّيسْ ن بِيكْرِي.

‏8 ؤُمِي ثنْ ثُوغَا نِيثْنِي غَارْ وژْرُو أَمقّْرَانْ ن جِيبْعُونْ، ثُوغَا عَامَاسَا زَّاثْ إِ وُوذمْ نْسنْ. يُووَابْ ثُوغَا إِتّْحزَّامْ أَرُّوضْ نّسْ ن ؤُمنْغِي إِ يَارْضْ. ثُوغَا خَاسْ إِجّْ ن ؤُحزَّامْ أَكْ-ذ سِّيفْ ذڭْ ؤُفُورُّونْ ن وغْڒَافْ إِ خَاسْ إِتّْوَاڭّنْ غَارْ ثجْعِينَّا نّسْ. ؤُمِي يُويُورْ نتَّا غَارْ زَّاثْ، إِوْضَا أَسْ سِّيفْ زَّايسْ. ‏9 إِنَّا يُووَابْ إِ عَامَاسَا: ”أَقَا شكْ مْلِيحْ، ؤُمَا؟“ إِشبَّارْ يُووَابْ س ؤُفُوسْ أَفُوسِي ذِي ثْمَارْثْ ن عَامَاسَا حِيمَا أَذْ ث إِسُّوذمْ.

‏10 عَامَاسَا وَارْ إِحكَّارْ إِ سِّيفْ إِ ثُوغَا ذڭْ ؤُفُوسْ ن يُووَابْ ؤُشَا نتَّا إِڒْقفْ إِ-ث زَّايسْ غَارْ ثْغزْذِيسْثْ وِيسّْ خمْسَا ن إِذْمَارنْ ؤُشَا فّْغنْ أَسْ-د وَاذَانْ غَارْ ثمُّورْثْ. نتَّا إِمُّوثْ بْڒَا مَا إِڒْقفْ إِ-ث إِشْثْ ن ثْوَاڒَا نّغْنِيثْ. ؤُ يُووَابْ أَكْ-ذ ؤُمَاسْ أَبِيشَايْ إِضْفَارْ شَابَاعْ، مِّيسْ ن بِيكْرِي. ^▪  

‏11 إِجّْ ن ورْيَازْ إِبدّْ غَارسْ غَارْ أَمَاسَا. ثُوغَا نتَّا زڭْ إِمْسخَّارنْ ن يُووَابْ، إِنَّا: ”أجّْ كُوڒْ إِجّنْ إِ إِدْجَانْ أَكْ-ذ يُووَابْ ؤُڒَا ذ ونِّي إِ إِدْجَانْ أَكْ-ذ ذَاوُوذْ، أَذْ إِضْفَارْ يُووَابْ!“ ^▫  

‏12 عَامَاسَا مَاشَا ثُوغَا إِزّڒْ إِتّْوَانّضْ ذڭْ إِذَامّنْ نّسْ ذڭْ وبْرِيذْ أَمقّْرَانْ. ؤُمِي إِژْرَا أَرْيَازْ، أَقَا مَارَّا ڒْڭنْسْ إِقِّيمْ إِبدّْ، إِجَارّْ نتَّا أَمَاسَا زڭْ وبْرِيذْ غَارْ ييَّارْ ؤُ إِنْضَارْ إِجّْ ن وَارُّوضْ ثِيوَا نّسْ، مِينْزِي إِژْرَا قَاعْ وِي غَارسْ د-إِوْضنْ، إِقِّيمْ إِتّْبدَّا.

‏13 أَڒَامِي ثُوغَا نتَّا إِتّْوَاڭّْوجْ خْ وبْرِيذْ، عْذُونْ مَارَّا إِرْيَازنْ أَوَارْنِي إِ يُووَابْ، حِيمَا أَذْ ضْفَارنْ شَابَاعْ، مِّيسْ ن بِيكْرِي،

‏14 ونِّي ثُوغَا إِكَّا خْ مَارَّا ثِيقبَّاڒْ ن إِسْرَائِيل غَارسْ أَڒْ أَبَالْ، ؤُ غَارْ بَايْثْ-مَاعْكَا ؤُ غَارْ مَارَّا إِبِيرِييّنْ. نِيثْنِي مُوننْ ؤُشَا رُوحنْ عَاوذْ أَوَارْنِي أَسْ.

‏15 أَمُّو د-ؤُسِينْ ؤُشَا نّْضنْ أَسْ-د ذِي أَبَالْ-بَايْثْ-مَاعْكَا. نِيثْنِي سّفْينْ إِجّْ ن لْبَارَاجْ خْ ثنْذِينْثْ ؤُ لْبَارَاجْ نِّي إِبدّْ غَارْ ڒْحِيضْ ن زَّاثْ إِ د-إِنّْضنْ إِ ثنْذِينْثْ. مَارَّا ڒْڭنْسْ إِ ثُوغَا أَكْ-ذ يُووَابْ، ڭِّينْ أَذْ أَردّْدْجنْ ڒْحِيضْ حِيمَا أَذْ أَسْ سّْغضْڒنْ.

‏16 خنِّي ثْڒَاغَا إِشْثْ ن ثمْغَارْثْ ذ ثْمِيغِيسْثْ زِي ثنْذِينْ:ث ”سْڒمْ، سْڒمْ، إِنِيمْ إِ يُووَابْ: ’أَسْ-د ذَا، أَذسْ-د، أَڒَامِي زمَّارغْ أَكِيذكْ سِّيوْڒغْ.‘ “

‏17 ؤُمِي د-يُوسَا نتَّا، يُوذسْ-د غَارسْ، ثنَّا ثمْغَارْثْ: ”مَا شكْ ذ يُووَابْ؟“ نتَّا إِنَّا: ”ذ نشّْ.“ ثنَّا أَسْ نتَّاثْ: ”سڒْ غَارْ وَاوَاڒنْ ن ثَايَّا نّكْ.“ نتَّا إِنَّا: ”نشّْ تّسْڒِيغْ.“

‏18 خنِّي ثنَّا: ”زِيشْ ثُوغَا سِّيوْڒنْ ذِي كُوڒْ أَمْشَانْ، نَّانْ: ’إِتّْخصَّا أَسنْ أَذْ ت سّقْسَانْ نِيشَانْ ذِي أَبَالْ!‘، ؤُشَا أَمُّو إِ كمّْڒنْ نِيثْنِي ثَامسْڒَاشْثْ نِّي مْلِيحْ.

‏19 نشّْ زڭْ إِنِّي ن أَيْثْ ن ڒهْنَا ذ إِمْثِيقَّانْ ذِي إِسْرَائِيل ؤُ شكْ ثخْسذْ أَذْ ثنْغذْ إِشْثْ ن ثنْذِينْثْ، ثنِّي ذ يمَّاسْ ذِي إِسْرَائِيل. مَايمِّي إِ غَا ثْصَارْضذْ ڒْوَارْثْ ن سِيذِي؟“ ‏20 يُووَابْ يَارَّا-د خَاسْ، إِنَّا: ”أَيَا إِڭّْوجْ خَافِي أَطَّاسْ بلِّي نشّْ أَذْ صَارْضغْ ؤُ أَذْ نْغغْ! ‏21 ثَامسْڒَاشْثْ وَارْ ثدْجِي أَمنِّي. مَاشَا إِجّْ ن ورْيَازْ زڭْ إِذُورَارْ ن إِفْرَايِيمْ، قَّارنْ أَسْ شَابْعَا، مِّيسْ ن بِيكْرِي، إِكْسِي أَفُوسْ نّسْ خْ ؤُجدْجِيذْ، خْ ذَاوُوذْ. نتَّا وَاهَا إِتّْخصَّا أَذْ ثوْشمْ، خنِّي أَذْ حيّْذغْ زِي ثنْذِينْثْ.“ ثنَّا ثمْغَارْثْ إِ يُووَابْ: ”خْزَارْ، أَزدْجِيفْ نّسْ أَذْ أَشْ د إِمّنْضَارْ ثِيوَا إِ ڒْحِيضْ.“ ‏22 ثُوسَا-د ثمْغَارْثْ س ثِيغِيثْ نّسْ غَارْ مَارَّا ڒْڭنْسْ ؤُ نِيثْنِي قسّنْ إِ شَابْعَا، مِّيسْ ن بِيكْرِي، أَزدْجِيفْ، نْضَارنْ ث إِ يُووَابْ. خنِّي إِصُوضْ يُووَابْ ذڭْ ؤُيِيشّْ ن إِشَارِّي ؤُ نِيثْنِي بزّْعنْ إِخفْ نْسنْ، ڭّْوجنْ خْ ثنْذِينْثْ ؤُ كُوڒْ أَرْيَازْ يُويُورْ غَارْ إِقِيضَانْ نّسْ ؤُ يُووَابْ إِعْقبْ غَارْ ؤُرْشَالِيمْ، غَارْ ؤُجدْجِيذْ.

‏23 يُووَابْ إِتّْوَاڭّْ ذ أَزدْجِيفْ خْ مَارَّا ڒْعسْكَارْ ن إِسْرَائِيل، ؤُ بَانَايَا، مِّيسْ ن يَاهُويَاذَاعْ، ثُوغَا خْ إِعسَّاسنْ ن أَرِّيمثْ ؤُ خْ إِرقَّاسنْ ن ثَازْڒَا. ‏24 أَذُورَامْ إِبدّْ خْ لْجِيزْيَا ؤُ يَاهُوشَافَاطْ، مِّيسْ ن أَخِيلُوذْ، ثُوغَا-ث ذ أَمَارِيرْ ن ؤُمزْرُويْ. ‏25 شِيوَا ثُوغَا ذ أَمَارِيرْ، ؤُ صَاذُوقْ ذ أَبْيَاثَارْ ثُوغَا أَثنْ ذ إِكهَّاننْ. ‏26 ؤُڒَا ذ عِيرَا زِي يَا‘إِرْ ثُوغَا ذ إِجّْ ن ؤُمْثِيقِّي ن ذَاوُوذْ.