‏1 إِرْيَازنْ ن إِفْرَايِيمْ تّْوَاسْمُوننْ إِ ؤُمنْغِي ؤُ نِيثْنِي ژْوَانْ غَارْ زَافُونْ. نَّانْ إِ يَافْثَاحْ: ”مَايمِّي ثژْوِيذْ حِيمَا أَذْ ثمّنْغذْ أَكْ-ذ أَيْثْ ن عَامُّونْ ؤُ وَارْ ذ أَنغْ ثْڒِيغِيذْ حِيمَا أَذْ نُويُورْ أَكِيذكْ؟ نشِّينْ أَذْ أَشْ نقّذْ ثِيمسِّي إِ ثَادَّارْثْ نّكْ ثِيوَا إِ ؤُزدْجِيفْ نّكْ ذ شكْ أَكِيذسْ.“ ^▪   ‏2 يَافْثَاحْ إِنَّا أَسنْ: ”نشّْ ذ ڒْڭنْسْ إِنُو ثُوغَا أَنغْ ذڭْ إِجّْ ن ؤُمْشُوبّشْ ذ أَمقّْرَانْ أَكْ-ذ أَيْثْ ن عَامُّونْ. ڒَاغِيغْ-د خَاومْ، مَاشَا كنِّيوْ وَارْ د-ثُوسِيمْ حِيمَا أَذْ أَيِي ثْفكّمْ زڭْ ؤُفُوسْ نْسنْ. ‏3 ؤُمِي ژْرِيغْ، بلِّي كنِّيوْ وَارْ د-ثُوسِيمْ إِ ؤُفكِّي، سبّْڒغْ ثُوذَارْثْ إِنُو ؤُشَا ژْوِيغْ لْ-ؤُرْذُونْ غَارْ أَيْثْ ن عَامُّونْ ؤُ سِيذِي إِڭَّا أَيِي ثنْ ذڭْ ؤُفُوسْ. مَايمِّي إِ د غَارِي ثْڭعّْذمْ أَسّْ-أَ حِيمَا أَكِيذِي ثمّنْغمْ؟“ ‏4 خَاسْ ؤُشَا إِسّْمُونْ يَافْثَاحْ مَارَّا إِرْيَازنْ زِي جِيلْعَاذْ ؤُشَا إِمْنغْ أَكْ-ذ إِفْرَايِيمْ ؤُ إِرْيَازنْ ن جِيلْعَاذْ غڒْبنْ خْ إِفْرَايِيمْ مِينْزِي نِيثْنِي نَّانْ: ”كنِّيوْ ذ إِنِّي يَاروْڒنْ زڭْ إِفْرَايِيمْ!“، أَقَا جِيلْعَاذْ يُوسَا-د جَارْ إِفْرَايِيمْ ذ مَانَاسَّا. ‏5 جِيلْعَاذْ إِحوّسْ إِمُوشَانْ ن ؤُژكّْوُو ن لْ'ؤُرْذُونْ إِنِّي إِدْجَانْ ن إِفْرَايِيمْ. ذ مَارَّا إِنِّي يَاروْڒنْ زِي إِفْرَايِيمْ نَّانْ: ”أجّْ أَيِي أَذْ ژْوِيغْ“، خنِّي سّقْسَانْ ث إِرْيَازنْ زِي جِيلْعَاذْ: ”مَا شكْ زِي إِفْرَايِيمْ؟“ مَاڒَا نتَّا إِنَّا: ”لَّ!“، ‏6 خنِّي نَّانْ أَسْ: ”إِنِي ’شِيبُّولِيثْ!‘ “ إِنَّا نتَّا خنِّي: ’سِيبُّولِيثْ!‘ ؤُ إِبَانْ-د نتَّا وَارْ إِزْمِيرْ أَذْ ث إِنْطقْ مْلِيحْ، خنِّي طّْفنْ ث ؤُشَا نْغِينْ ث غَارْ إِمُوشَانْ ن ؤُژكّْوُو ن لْ'ؤُرْذُونْ. أَمُّو إِ وْضَانْ ثْنَاينْ ؤُ-ربْعِينْ-أَڒفْ ن يرْيَازنْ ن إِفْرَايِيمْ ذِي ڒْوقْثْ نِّي. ‏7 ثُوغَا يَافْثَاحْ إِحكّمْ إِسْرَائِيل ستَّا ن إِسڭّْوُوسَا. خنِّي إِمُّوثْ يَافْثَاحْ، أَجِيلْعَاذِي، ؤُ نتَّا إِتّْوَانْضڒْ ذڭْ إِشْثْ زِي ثْندَّامْ ن جِيلْعَاذْ.

‏8 أَوَارْنِي أَسْ ثُوغَا إِبْصَانْ زِي بَايْثْ-لَاحْمْ ذ ڒْقَاضِي خْ إِسْرَائِيل. ‏9 نتَّا ثُوغَا غَارسْ ثْڒَاثِينْ ن إِحنْجِيرنْ ؤُ إِسّْمدْجشْ ثْڒَاثِينْ ن يسِّيسْ غَارْ بَارَّا ؤُ إِ ثْڒَاثِينْ ن إِحنْجِيرنْ نّسْ إِجَّا إِ-ثنْ أَذْ أَوْينْ ثْڒَاثِينْ ن يسِّيسْ زِي بَارَّا. ثُوغَا نتَّا إِحكّمْ خْ إِسْرَائِيل سبْعَا ن إِسڭّْوُوسَا.

‏10 خنِّي إِمُّوثْ إِبْصَانْ ؤُشَا إِتّْوَانْضڒْ ذِي بَايْثْ-لَاحْمْ.

‏11 أَوَارْنِي أَسْ ثُوغَا إِلُونْ، أَزَاپُولُونِي، ذ ڒْقَاضِي خْ إِسْرَائِيل. نتَّا إِحْكمْ خْ إِسْرَائِيل عشْرَا ن إِسڭّْوُوسَا. ^▫  

‏12 خنِّي إِمُّوثْ إِلُونْ، أَزَاپُولُونِي، ؤُشَا إِتّْوَانْضڒْ ذِي أَيَالُونْ ذِي ثمُّورْثْ ن زَاپُولُونْ.

‏13 أَوَارْنِي أَسْ ثُوغَا عَابْذُونْ، مِّيسْ ن هِيلَّالْ، زِي فِيرْعَاثُونْ، ذ ڒْقَاضِي خْ إِسْرَائِيل.

‏14 نتَّا ثُوغَا غَارسْ أَربْعِينْ ن إِحنْجِيرنْ ذ ثْڒَاثِينْ ن وَايَّاونْ، إِنِّي إِنَّاينْ خْ سبْعِينْ ن إِغْيَاڒْ. نتَّا ثُوغَا ذ ڒْقَاضِي خْ إِسْرَائِيل ثْمنْيَا ن إِسڭّْوُوسَا. ^▪  

‏15 خنِّي إِمُّوثْ عَابْذُونْ، مِّيسْ ن هِيلّلْ، زِي فِيرْعَاثُونْ، ؤُشَا إِتّْوَانْضڒْ ذِي فِيرْعَاثُونْ، ذِي ثمُّورْثْ ن إِفْرَايِيمْ، خْ وذْرَارْ ن ؤُعَامَالِيقِي. ^▫