إِزْڒِي ن ؤُغلّبْ ن ذَاپُورَا ذ بَارَاقْ
5
1 ذڭْ وَاسّْ نِّي ثْغنّجْ ذَاپُورَا أَكْ-ذ بَارَاقْ، مِّيسْ ن أَبِينُوعَامْ، ثنَّا: 2 ”بَارْكمْ سِيذِي إِ إِجطَّاينْ ن ؤُشوَّافْ إِتّْوَافسّْينْ ذِي إِسْرَائِيل،
س ؤُطوّعْ ن ڒْڭنْسْ س ڒْخَاضَارْ!“
3 سْڒمْ، كنِّيوْ، إِجدْجِيذنْ، سْحسّمْ، كنِّيوْ، أَيْثْ ن جّهْذْ!
نشّْ أَذْ غنّْجغْ إِزْڒَانْ إِ سِيذِي،
نشّْ أَذْ زهّْذغْ إِ سِيذِي، أَربِّي ن إِسْرَائِيل.
4 أَ سِيذِي، ؤُمِي شكْ د-ثفّْغذْ زِي سَاعِيرْ،
ؤُمِي شكْ ثُوغَا د ثڭُّورذْ زڭْ إِيَّارْ ن إِذُومْ،
ثنْهزّْ ثمُّورْثْ، يَارْجِيجْ ؤُجنَّا،
وَاهْ، ؤُڒَا ذ إِسيْنُوثنْ فَارّْغنْ-د س وَامَانْ. ▪
5 إِذُورَارْ فسْينْ زَّاثْ إِ وُوذمْ ن سِيذِي،
أَذْرَارْ نِّي ن سِينَا، إِفْسِي زَّاثْ إِ وُوذمْ ن سِيذِي، أَربِّي ن إِسْرَائِيل. ▪
6 ذڭْ وُوسَّانْ ن شَامْجَارْ، مِّيسْ ن عَانَاثْ،
ذڭْ وُوسَّانْ ن يَاعِيلْ، قِّيمنْ إِبْرِيذنْ خْڒَانْ،
ؤُ إِنِّي ثُوغَا إِڭُّورنْ خْ ثبْرِيذِينْ،
تّكّنْ إِمسْرَاقْ إِعَارّْقنْ.
7 إِمْجَاهذنْ وَارْ قِّيمنْ، وَارْ قِّيمنْ ذِي إِسْرَائِيل،
غَارسْ أَڒَامِي نشّْ، ذَاپُورَا،
كَّارغْ نشّْ، يمَّاسْ ن إِسْرَائِيل.
8 ؤُمِي إِفَارْزْ ڒْڭنْسْ إِربِّيثنْ إِمَايْنُوثنْ،
خنِّي ثُوغَا ذِينْ إِجّْ ن ؤُمنْغِي إِنقّنْ غَارْ ثوُّورَا.
ثَاسدَّارْثْ ن ؤُعسْكَارْ ذ ؤُحْرِيشْ،
وَارْ تّْوَاژَارنْ شَا جَارْ أَربْعَا-أَڒَافْ ذِي إِسْرَائِيل؟
9 ؤُڒْ إِنُو أَكْ-ذ إِمْڭوَّاذنْ ن إِسْرَائِيل،
إِنِّي إِطوّْعنْ إِخفْ نْسنْ جَارْ ڒْڭنْسْ س ڒْخَاضَارْ،
لْبَارَاكَا إِ سِيذِي!
10 أَ كنِّيوْ، إِنِّي إِنَّاينْ خْ ثغْيَاڒْ ذ ثِيشمْڒَاڒِينْ،
كنِّيوْ إِنِّي إِتّْغِيمَانْ خْ ثْزَارْبِييِّينْ
ذ كنِّيوْ إِنِّي إِڭُّورنْ ذڭْ وبْرِيذْ، سِيوْڒمْ خْ مَانْ أَيَا!
11 س ثْمِيجَّا ن إِمْجبَّاذنْ نْ ڒْقوْسْ، ذِينْ جَارْ وَانُوثنْ،
أَقَا إِتّْوَاسڒْ وَاوَاڒْ خْ ثْمڭَّا إِسڭّْذنْ ن سِيذِي،
ثِيمڭَّا إِسڭّْذنْ ن إِمْجَاهَاذنْ ن إِسْرَائِيل.
خنِّي إِهْوَا-د ڒْڭنْسْ ن سِيذِي غَارْ ثوُّورَا ن ثنْذِينْثْ.
12 فَاقْ، فَاقْ، ذَاپُورَا، فَاقْ، فَاقْ، سِيوڒْ س يِيجّْ ن إِزْڒِي!
كَّارْ، بَارَاقْ، حبّسْ إِمحْبَاسْ نّكْ،
أَ شكْ، مِّيسْ ن أَبِينُوعَامْ!
13 خنِّي إِهْوَا وِي إِقِّيمنْ ن أَيْثْ ن جّهْذْ جَارْ ڒْڭنْسْ،
سِيذِي إِهْوَا-د ɣ̮أَرِي أَكْ-ذ أَيْثْ ن بُو-ثغْرُوضْثْ.
14 زڭْ إِفْرَايِيمْ إِنِّي أَژْوَارْ نْسنْ ذِي عَامَالِيقْ
ؤُ أَوَارْنِي أَشْ بِينْيَامِينْ جَارْ ڒْعسْكَارَاثْ ن يوْذَانْ نّكْ.
زِي مَاخِيرْ هْوَانْ إِمْڭوَّاذنْ،
ؤُ زِي زَاپُولُونْ إِنِّي إِطّْفنْ أَعكَّازْ ن ثِيرَا.
15 ڒْحُوكَّامْ ن إِسَّاكَارْ هْوَانْ-د أَكْ-ذ ذَاپُورَا
ؤُشَا أَمشْنَاوْ مَامّشْ إِتّْوَاسّكّْ إِسَّاخَارْ،
أَمُّو إِ إِتّْوَاسّكّْ ؤُڒَا ذ بَارَاقْ ذِي ڒوْضَا ن ثغْزُورْثْ.
ذِي ڒصْفُوفْ ن رُوبِينْ ثُوغَا إِخَارِّيصنْ ن وُوڒْ ذ أَطَّاسْ.
16 مَايمِّي ثقِّيمذْ جَارْ إِغنْذِيفنْ،
ثسّْحسّذْ غَارْ وسْپُوعْرِييْ ن ثْحِيمْرِيوِينْ؟
ذِي ڒصْفُوفْ ن رُوبِينْ ڭِّينْ أَذْ بقّْشنْ ذڭْ وُوڒْ أَطَّاسْ.
17 جِيلْعَاذْ إِقِّيمْ إِزدّغْ خْ ؤُجمَّاضْ ن لْ'ؤُرْذُونْ
ؤُ مَايمِّي إِقِّيمْ ذَانْ غَارْ ثْغَارُّوبَا أَمْ إِجّْ ن ؤُبَارَّانِي؟
أَشِيرْ إِقِّيمْ غَارْ ثْمَا ن ڒبْحَارْ
ؤُشَا إِقِّيمْ إِزدّغْ غَارْ إِفْثَاسنْ نّسْ.
18 زَاپُولُونْ ذ إِجّْ ن ڒْڭنْسْ إِسبّڒْ ثُوذَارْثْ نّسْ أَڒْ ڒْموْثْ،
أَمْ ث إِڭَّا ؤُڒَا ذ نَافْثَالِي ذِي ڒڭْعُوذِي ن وَازَّايْ ن ؤُمنْغِي.
19 إِجدْجِيذنْ ؤُسِينْ-د، منْغنْ.
ڒخْذنِّي مّنْغنْ إِجدْجِيذنْ ن كنْعَانْ
ذِي ثَاعْنَاكْ غَارْ وَامَانْ ن مَاجِيدُّو.
وَارْ كْسِينْ مَاشَا ثَاكشَّاضْثْ ن نُّوقَارْثْ.
20 زڭْ ؤُجنَّا مّنْغنْ،
إِثْرَانْ منْغنْ أَكْ-ذ سِيسَارَا زِي ثبْرِيذِينْ نْسنْ.
21 إِغْزَارْ ن قِيشُونْ إِوْيِي إِ-ثنْ،
ثِيغْزَارْثْ ن مشْحَاڒْ ؤُيَا، ثِيغْزَارْثْ ن قِيشُونْ،
ؤُيُورْ س جّهْذْ، أَ ڒعْمَارْ إِنُو.
22 ڒخْذنِّي دّْزنْ ثِيشضْيِينْ ن إِيْسَانْ زڭْ ؤُزرْزرْ
إِ زِي إِزّرْزْرنْ إِنِّي إِجهْذنْ س يِييْسَانْ نْسنْ.
23 نعْڒمْ مِيرُوزْ، إِنَّا لْمَالَاكْ ن سِيذِي،
نعْڒمْ إِمزْذَاغْ نّسْ س إِشْثْ ن نّعْڒثْ،
مِينْزِي وَارْ د-ؤُسِينْ حِيمَا أَذْ وْشنْ أَفُوسْ إِ سِيذِي،
حِيمَا أَذْ وْشنْ أَفُوسْ إِ سِيذِي س أَيْثْ ن بُو-ثغْرُوضْثْ.
24 ثتّْوَابَاركْ يَاعِيلْ، ثَامْغَارْثْ ن حَابِيرْ، أَقِينِي،
سنّجْ إِ مَارَّا ثِيمْغَارِينْ.
ثتّْوَابَاركْ نتَّاثْ سنّجْ إِ مَارَّا ثِيمْغَارِينْ إِزدّْغنْ ذڭْ إِقِيضَانْ.
25 نتَّا إِتَّارْ أَمَانْ، نتَّاثْ ثوْشَا أَسْ أَغِي،
ثِيوِي أَسْ-د ثْرُوسِّي ذڭْ إِشْثْ ن طّبْصِي ذ أَمقّْرَانْ أَطَّاسْ.
26 س ؤُفُوسْ نّسْ ثسّْوِيژّضْ غَارْ ڒوْثذْ
ؤُ أَفُوسِي نّسْ غَارْ وفْضِيسْ ن إِخدَّامنْ.
نتَّاثْ ثوْثَا سِيسَارَا، ثڒْبزْ أَسْ أَزدْجِيفْ نّسْ،
ثْعبّزْ خَاسْ ؤُشَا ثسّْنُوقّبْ أَسْ أَغزْذِيسْ ن ؤُزدْجِيفْ نّسْ.
27 إِكْمُومّشْ جَارْ إِضَارنْ نّسْ، إِبُّوزّڒْ، أَقَا إِزّڒْ ذِينْ.
أَقَا إِكْمُومّشْ جَارْ إِضَارنْ نّسْ، إِبُّوزّڒْ.
ؤُمِي ثُوغَا إِتّكْمُومُّوشْ، إِوْضَا ذِينْ، ؤُشَا إِوْضَا-د إِڒقّفْ!
28 زِي ڒْكَازِي نّسْ ثخْزَارْ-د يمَّاسْ ن سِيسَارَا ؤُشَا ثسْغُويّْ جَارْ إِقْضِيبنْ ن وُوزَّاڒْ
’مَايمِّي إِعطَّاڒْ ؤُكَارُّو نّسْ أَمُّو أَطَّاسْ؟
مَايمِّي إِكَارُّوثنْ نّسْ قِّيمنْ وَارْ ڭُّورنْ ؤُڒَا ذ إِشْثْ ن ؤُصُورِيفْ؟‘
29 إِنِّي ذ ثِيغْمِيسِينْ أَطَّاسْ جَارْ ثْجدْجِيذِينْ نّسْ أَرِّينْثْ-إِ-د،
ؤُشَا ؤُڒَا ذ نتَّاثْ سِيمَانْثْ نّسْ ثَارَّا-د خْ مِينْ ثنَّا:
30 ’مَا خنِّي نِيثْنِي وَارْ ؤُفِينْ وَالُو
ؤُشَا أَقَا أَثنْ وَارْ ڭُّورْ أَذْ بْضَانْ ثَاكشَّاضْثْ؟
إِ كُوڒْ أَرْيَازْ إِجهْذنْ إِشْثْ ن ثعْزَارشْثْ نِيغْ ثْنَاينْ ن ثعْزَارِييِّينْ؟
ثَاكشَّاضْثْ ن إِكتَّاننْ إِتّْوَاسْقَارقْشنْ إِ سِيسَارَا،
ثَاكشَّاضْثْ ن إِكتَّاننْ إِتّْوَاسْقَارقْشنْ،
أَپُورْضَا، ڒْخذْمثْ ن ؤُمُوذِي غَارْ ثْنَاينْ ن إِغزْذِيسنْ
زڭْ ؤُكتَّانْ إِتّْوَاسْقَارقْشنْ إِ إِرَاونْ،
أَمْ ثْكشَّاضْثْ؟‘
31 أَمُّو إِ غَا هلّْكنْ ڒْعذْيَانْ نّكْ، أَ سِيذِي،
مَاشَا إِنِّي ث إِتّخْسنْ أَذْ إِڒِينْ أَمْ ثْفُوشْثْ
إِ د-إِنقَّارنْ ذِي جّهْذْ نّسْ.“
ؤُشَا ثَامُّورْثْ ثَاريّحْ أَربْعِينْ ن إِسڭّْوُوسَا.