‏1 لْمَالَاكْ ن سِيذِي إِڭعّذْ زِي جِيلْجَالْ غَارْ بُوكِيمْ، إِنَّا: ”نشّْ سُّوفّْغغْ-د كنِّيوْ زِي مِيصْرَا ؤُشَا إِوْيغْ-د كنِّيوْ غَارْ ثمُّورْثْ نِّي خْ جُّودْجغْ إِ إِبَابَاثنْ نْومْ، نِّيغْ: ’نشّْ عمَّارْصْ وَارْ تَّارژِّيغْ ڒْعَاهْذْ إِنُو أَكِيذْومْ إِ ڒبْذَا. ^▪   ‏2 ؤُشَا كنِّيوْ، وَاهْ كنِّيوْ، وَارْ ثْزمَّارمْ أَذْ ثڭّمْ ڒْعَاهْذْ أَكْ-ذ إِمزْذَاغْ ن ثمُّورْثْ-أَ، ؤُ إِتّْخصَّا أَومْ أَذْ ثْغضْڒمْ إِعَالْطَارنْ نْسنْ!‘ مَاشَا كنِّيوْ وَارْ ثسْڒِيمْ شَا إِ ثْمِيجَّا إِنُو. مَايمِّي ثڭِّيمْ أَيَا؟ ^▪   ‏3 ؤُ نشّْ نِّيغْ أَومْ عَاوذْ: ’أَقَا وَارْ خَاسنْ ثَاژّْڒغْ زَّاثْ إِ وُوذمْ نْومْ، مَاشَا نِيثْنِي أَذْ إِڒِينْ أَمْ إِسنَّاننْ ذڭْ إِغزْذِيسنْ نْومْ ؤُشَا إِربِّيثنْ نْسنْ أَذْ أَومْ ذوْڒنْ ذ ثَاخْشفْثْ.‘ “ ^▪   ‏4 ؤُمِي لْمَالَاكْ ن سِيذِي ثُوغَا إِسِّيوڒْ أَوَاڒنْ-أَ غَارْ مَارَّا أَيْثْ ن إِسْرَائِيل، إِمْسَارْ، أَقَا ڒْڭنْسْ إِسّْڭعّذْ ذِي ثْمِيجَّا نّسْ ؤُشَا ثْرُونْ نِيثْنِي. ‏5 نِيثْنِي قَّارنْ أَسْ إِ ومْشَانْ نِّي ’بُوكِيمْ‘ ؤُشَا نِيثْنِي قدّْمنْ ذِينْ ثَاغَارْصْثْ إِ سِيذِي. ^▫  

‏6 ؤُمِي يَاشُووَا إِسّكّْ ڒْڭنْسْ، فّْغنْ أَيْثْ ن إِسْرَائِيل، كُوڒْ أَرْيَازْ غَارْ ثسْغَارْثْ نّسْ، مَاحنْذْ أَذْ طّْفنْ ثَامُّورْثْ ذ ڒْوَارْثْ. ^▪   ‏7 ثُوغَا ڒْڭنْسْ إِسخَّارْ إِ سِيذِي مَارَّا ؤُسَّانْ ن يَاشُووَا ذ مَارَّا ؤُسَّانْ ن إِمْغَارنْ، إِنِّي عَاذْ إِقِّيمنْ دَّارنْ أَطَّاسْ أَوَارْنِي إِ يَاشُووَا ؤُ إِنِّي إِژْرِينْ مَارَّا ڒْخذْمثْ ثَامقّْرَانْثْ ن سِيذِي ثنِّي إِڭَّا أَكْ-ذ إِسْرَائِيل. ‏8 يَاشُووَا، مِّيسْ ن نُونْ، أَمْسخَّارْ ن سِيذِي، إِمُّوثْ أَمْ إِجّْ ن بْنَاذمْ ذ بَابْ ن مْيَا ؤُ-عشْرَا ن إِسڭّْوُوسَا. ‏9 نضْڒنْ ث ذَاخڒْ إِ ويْمِيرْ ن ثسْغَارْثْ نّسْ ذِي ثِيمْنَاثْ-حَارَاسْ، ذِي ثمُّورْثْ ن إِذُورَارْ ن إِفْرَايِيمْ، غَارْ ؤُغزْذِيسْ ن شَّامَالْ ن وذْرَارْ ن جَاعَاشْ.

‏10 ؤُ عَاوذْ إِتّْوَاسْمُونْ مَارَّا جِّيڒْ نِّي غَارْ ڒجْذُوذْ نّسْ. أَوَارْنِي أَسنْ إِكَّارْ-د إِجّْ ن جِّيڒْ نّغْنِي، جِّيڒْ نِّي وَارْ إِسِّينْ شَا سِيذِي ؤُ وَارْ إِسِّينْ شَا ڒْخذْمثْ إِ إِڭَّا أَكْ-ذ إِسْرَائِيل.

‏11 خنِّي ڭِّينْ أَيْثْ ن إِسْرَائِيل مِينْ ثُوغَا إِدْجَانْ ذ أَعفَّانْ ذِي ثِيطَّاوِينْ ن سِيذِي ؤُشَا سخَّارنْ إِ ’إِبَاعَالنْ‘

‏12 نِيثْنِي جِّينْ سِيذِي، أَربِّي ن إِبَابَاثنْ نْسنْ، ونِّي ثنْ-د إِسُّوفّْغنْ زِي مِيصْرَا ؤُشَا نِيثْنِي ضْفَارنْ إِربِّيثنْ نّغْنِي، إِربِّيثنْ ن ڒڭْنُوسْ إِ ذ أَسنْ-د إِنّْضنْ، ؤُشَا ؤُضَارنْ أَسنْ ؤُ أَمُّو إِ سْعَارنْ سِيذِي.

‏13 مَاغَارْ نِيثْنِي جِّينْ سِيذِي ؤُشَا ذوْڒنْ سخَّارنْ إِ بَاعَالْ ؤُ إِ عَاشْثَارُوثِينْ

‏14 خْ ؤُيَا يَارْغَا وغْضَابْ ن سِيذِي خْ إِسْرَائِيل. نتَّا إِڭَّا إِ-ثنْ ذڭْ ؤُفُوسْ ن إِشفَّارنْ إِ ثنْ إِكشّْضنْ ؤُ إِڭَّا إِ-ثنْ ذڭْ ؤُفُوسْ ن ڒْعذْيَانْ نْسنْ إِ ذ أَسنْ د-إِنّْضنْ ؤُشَا ذوْڒنْ وَارْ زمَّارنْ أَذْ قِّيمنْ بدّنْ زَّاثْ إِ وُوذمْ ن ڒْعذْيَانْ نْسنْ. ^▪  

‏15 مَانِي مَا فّْغنْ نِيثْنِي، ثُوغَا أَفُوسْ ن سِيذِي ضِيدّْ نْسنْ إِ ڒْغَارْ، أَمْ مَامّشْ ثُوغَا إِسِّيوڒْ سِيذِي ؤُ أَمْ مَامّشْ ثُوغَا إِ ذ أَسنْ إِجِّيدْجْ سِيذِي. أَقَا تّْوَاحْصَارنْ أَڒْ أَنڭَّارْ. ^▪  

‏16 سِيذِي إِسّكَّارْ عَاوذْ ڒْقُوضَاثْ، إِنِّي ثنْ إِسّْنجْمنْ زڭْ ؤُفُوسْ ن يِينِّي ثنْ إِكشّْضنْ.

‏17 نِيثْنِي وَارْ سْڒِينْ شَا ؤُڒَا غَارْ ڒْقُوضَاثْ نْسنْ، مَاشَا سّْفسْذنْ إِخفْ نْسنْ ؤُمِي ؤُيُورنْ أَوَارْنِي إِربِّيثنْ نّغْنِي ؤُشَا ؤُضَارنْ أَسنْ. ذغْيَا حيّْذنْ خْ وبْرِيذْ نِّي ثُوغَا ذِي ؤُيُورنْ إِبَابَاثنْ نْسنْ، إِنِّي ثُوغَا إِسْڒِينْ إِ ثْوصَّا ن سِيذِي. نِيثْنِي مَاشَا وَارْ ڭِّينْ أَمنِّي!

‏18 ؤُمِي ذ أَسنْ د-إِسّكَّارْ سِيذِي ڒْقُوضَاثْ، ثُوغَا سِيذِي أَكْ-ذ ڒْقَاضِي ؤُشَا إِسّنْجمْ إِ-ثنْ زڭْ ؤُفُوسْ ن ڒْعذْيَانْ نْسنْ، مَارَّا ؤُسَّانْ ن ڒْقَاضِي نِّي، مَاغَارْ سِيذِي ثُوغَا إِنْذمْ زِي سِّيبّثْ ن إِغُويَّانْ نْسنْ زَّاثْ إِ وُوذمْ ن يِينِّي ثنْ إِحْصَارنْ ذ ينِّي إِ خَاسنْ إِتَّاژّْڒنْ.

‏19 ؤُشَا إِمْسَارْ ؤُمِي إِمُّوثْ ڒْقَاضِي، أَقَا نِيثْنِي ذوْڒنْ غَارْ ضفَّارْ ؤُشَا ذوْڒنْ عفّْننْ كْثَارْ زڭْ إِبَابَاثنْ نْسنْ ؤُمِي ؤُيُورنْ أَوَارْنِي إِربِّيثنْ نّغْنِي ؤُ سخَّارنْ أَسنْ ؤُشَا ؤُضَارنْ غَارْسنْ. نِيثْنِي وَارْ جِّينْ زِي ثْمڭَّا نْسنْ ثِيعفَّانِينْ ؤُ زِي وبْرِيذْ نْسنْ إِ ثُوغَا ضفَّارنْ س ثْغنَّانْثْ. ^▪   ‏20 خنِّي يَارْغَا وغْضَابْ ن سِيذِي خْ إِسْرَائِيل ؤُشَا نتَّا إِنَّا: ”مِينْزِي ڒْڭنْسْ-أَ إِعدَّا ڒْعَاهْذْ إِنُو مِينْ خفْ وصِّيغْ إِبَابَاثنْ نْسنْ ؤُ وَارْ سْڒِينْ إِ ثْمِيجَّا إِنُو، ‏21 ؤُڒَا ذ نشّْ وَارْ قِّيمغْ عَاذْ أَذْ أَژّْڒغْ زَّاثْ إِ وُوذمْ نْسنْ خْ ڒڭْنُوسْ نِّي إِجَّا يَاشُووَا، ؤُمِي إِمُّوثْ، ^▪   ‏22 أَڒَامِي نشّْ أَذْ زَّايْسنْ قدْجْبغْ إِسْرَائِيل، مَا أَذْ حْضَانْ نِيثْنِي أَبْرِيذْ ن سِيذِي مَاحنْذْ أَذْ ذَايسْ ؤُيُورنْ أَمْ مَامّشْ ث حْضَانْ إِبَابَاثنْ نْسنْ، نِيغْ لَّا.“ ‏23 ؤُشَا إِجَّا سِيذِي ڒڭْنُوسْ-أَ أَذْ أَريّْحنْ ؤُشَا وَارْ خَاسنْ يُوژِّيڒْ ذغْيَا ؤُ عَاوذْ نتَّا وَارْ ثنْ إِڭِّي ذڭْ ؤُفُوسْ ن يَاشُووَا.